Rannsóknaverkefni Matra

Hér að neðan er listi yfir rannsóknaverkefni hjá Matra.  Listinn er ekki tæmandi og ekki koma fram verkefni sem unnin voru fyrir fyrirtæki án utanaðkomandi styrkja

Innlend rannsóknaverkefni eru mjög stór hluti af starfsemi Matvælarannsókna Keldnaholti. Fyrst og fremst er um að ræða samstarfsverkefni við fyrirtæki í matvælaiðnaði, rannsóknastofnanir og háskóla. Verkefnin eru yfirleitt fjármögnuð af innlendum sjóðum og vega þar þyngst sjóðir Rannís og Framleiðnisjóður landbúnaðarins. Samstarfsaðilar koma einnig að fjármögnun að einhverju leyti en einnig er mögulegt að þau séu eingöngu fjármögnuð af fyrirtækjum. Markmið verkefnanna er yfirleitt að leysa einhver tæknileg vandamál, sem fyrirtækin hafa ekki aðstöðu eða sérþekkingu til að leysa sjálf. Stefnt er að því að árangur verkefnanna skili sér til fyrirtækjanna innan tveggja til fjögurra ára. Eitt og eitt verkefni er ekki unnið í samstarfi við fyrirtæki, en þá er fyrst og fremst um að ræða uppbyggingu þekkingar eða hæfni á ákveðnum sviðum.

Erlend rannsóknaverkefni eru einnig mjög mikilvægur þáttur í starfseminni. Með þátttöku í slíkum verkefnum gefst sérfræðingum Matvælarannsókna tækifæri til þess að starfa náið með fremstu sérfræðingum Evrópu á einstökum afmörkuðum sviðum. Samstarfið leiðir til þess að ný þekking og tækni er flutt til landsins og miðlað til matvælafyrirtækja. Verkefni þessi standa yfirleitt í þrjú til fjögur ár og eru samstarfsverkefni aðila frá tveimur eða fleiri löndum. Á sviði matvælatækni hefur Iðntæknistofnun einkum tekið þátt í norrænum verkefnum, sem fjármögnuð eru af Norræna iðnaðarsjóðnum svo og Evrópuverkefnum, sem fjármögnuð eru af Evrópusambandinu. Í dag eru Matvælarannsóknir Keldnaholti í samstarfi við fjölmörg fyrirtæki og stofnanir í Evrópu í slíkum verkefnum.