MMI - nýsköpun í starfandi fyrirtækjum

Fjöldi leiðandi íslenskra fyrirtækja, norræna Nýsköpunarmiðstöðin, Nýsköpunarmiðstöð Íslands og helstu nýsköpunar- og tæknistofnanir á Norðurlöndunum hafa undanfarin tvö ár unnið að þróun aðferða sem miða að því að auka nýsköpun og virði í starfandi fyrirtækjum. Verkefnið, Measured and Managed Innovation eða MMI, gengur út á að greina möguleika til nýsköpunar með því að vinna markvisst að nýsköpun á fleiri „sviðum“ í stjórnun og rekstri fyrirtækja eða með því að skapa ný viðskiptatækifæri á óhefðbundinn hátt. Í verkefninu unnu starfandi fyrirtæki markvisst að því að nálgast nýsköpun með nýjum hætti, breyttum aðferðum og viðskiptalíkönum og sköpuðu þannig ný verðmæti.

Tuttugu og fjögur íslensk fyrirtæki tóku virkan þátt í verkefninu, mörg með eftirtektarverðum árangri. Fyrirtækin komu af fjölbreyttum sviðum atvinnulífsins og var Páll Kr. Pálsson einn þeirra ráðgjafa sem fenginn var til að vinna með fyrirtækjunum í verkefninu. Páll hefur til fjölda ára sérhæft sig í rekstrarráðgjöf til lítilla og meðalstórra fyrirtækja.  Óhætt er að segja að verkefnið hafi hvatt þau fyrirtæki sem tóku virkan þátt til að endurskoða áherslur sínar og skýra sýn sína á nýsköpun og tækifæri til vaxtar.  Árangur MMI verkefnisins fór fram úr væntingum allra sem að því stóðu og greinilegt er að mörg sóknartækifæri blasa við á sviði nýsköpunar hjá starfandi fyrirtækjum.

• Myndband með upplifun og reynslusögum er að finna hér
• Skýrslu um verkefnið (ensk útgáfa) er að finna hér

Nánari upplýsingar um verkefnið veitir Berglind Hallgrímsdóttir, framkvæmdastjóri Impru á Nýsköpunarmiðstöð Íslands í síma: 522-9263 /  netfang: berglindh@nmi.is