Alþjóðleg Fab Lab kennsla er nú aðgengileg almenningi í gegnum fjarfundabúnað í Fab Lab smiðju Nýsköpunarmiðstöðvar Íslands í Vestmannaeyjum.
Kennsla fer fram á mánudögum kl. 17:00 og MIT háskólinn sér um hana.

Undanfarnar vikur hefur verið stöðugur straumur fólks að kynna sér starfsemina í Fab Lab smiðjunni í Nýsköpunarmiðstöð Íslands Vestmannaeyjum; sumir hafa komið af einskærri forvitni en aðrir haft mjög ákveðnar hugmyndir um hvað þeir vilja skapa.

Nýsköpunarmiðstöð Íslands stendur á þessari önn fyrir námskeiðum í stafrænni framleiðslutækni í samvinnu við Framhaldsskólann í Vestmannaeyjum og Visku. "Námskeiðið sem er að hefjast í Framhaldsskólanum verður valnámskeið til þriggja eininga sem hugsað er fyrir fólk bæði á verknáms- og bóknámsbrautum sem vilja efla skilning sinn á tölvutækni og iðnaði," segir Frosti Gíslason verkefnisstjóri hjá Nýsköpunarmiðstöðinni.