Einkaleyfi, vörumerkjaskráning, hönnunarvernd og höfundarréttur eru þau tæki sem vernda hugmyndir og uppfinningar.  Án verndar af einhverju tagi er erfitt að koma hugmynd að uppfinningu í verð, því það er ekkert haldbært til að selja, ef allir mega framkvæma hugmyndina.

Ef maður getur hugsað sér að koma hugmyndinni sjálfur í verð með framleiðslu, þá er ekki endilega lausnin fólgin í því að leggja í langt og dýrt ferli einkaleyfisumsóknar.  Sumar viðskiptahugmyndir eru þess eðlis að það er jafnvel skynsamlegra að leggja fé í að drífa vöruna á markað, ná yfirburðum á honum og hagnast þannig, jafnvel þótt einhverjir muni síðan fylgja í kjölfarið og þróa svipaða vöru.

Það er heldur ekki sjálfgefið að hugmynd sé verjanleg með hönnunarvernd eða einkaleyfi, þótt fé sé lagt í að reyna það.   Einhver kann að hafa fengið þessa  “brilljant”  hugmynd áður.

Fengið einkaleyfi er heldur alls ekki ávísun á verðmæti, því til að vara sé verðmæt þarf að vera nægilegur markaður fyrir hana, þ.e. það þarf að vera tilbúinn nægilega stór hópur kaupenda sem eru tilbúnir að greiða fyrir vöruna á þeim tíma sem hún kemur fram.  Réttindin sem fylgja einkaleyfi eru hins vegar mjög skýr, þannig að þú getur selt eða leigt réttindin, finnist áhugaverður kaupandi.  Þrátt fyrir að ferillinn við að fá einkaleyfi sé dýr, er best að fá fagfólk til að aðstoða í vinnuferlinu, bæði leitinni og við skrásetningu hugmyndar, því sé grunnvinnan ekki nægilega góð kann því fé sem lagt er í ferlið að vera kastað á glæ.

Höfundarréttur
Einkaleyfi
Hönnunarvernd
Vörumerki

Guðmundur Óli Hilmisson veitir nánari upplýsingar um einkaleyfi, hönnunarvernd og vörumerkjaskráningu í síma 522 9433  eða á netfanginu goh@nmi.is.

Til baka

---