Hvar getur þú leitað aðstoðar?

Stuðningur við frumkvöðla og nýsköpun á Íslandi er fjölbreyttur og á hendi margra aðila.

Helstu sjóðir stuðningsumhverfisins

Styrkir Impru á Nýsköpunarmiðstöð
Impra á Nýsköpunarmiðstöð hefur umsjón með fjölmörgum fræðslu- og stuðningsverkefnum fyrir frumkvöðla og fyrirtæki.

Sjóðir Rannís (m.a. Tækniþróunarsjóður)
Hlutverk RANNÍS er m.a. að styrkja stoðir íslenskrar menningar og atvinnulífs með því að stuðla að markvissu vísindastarfi, tækniþróun og nýsköpun. Í vörslu RANNÍS eru m.a.:

Tækniþróunarsjóður stuðlar að því að bæta samkeppnisstöðu atvinnulífsins með því að styðja þróunarstarf og rannsóknir á sviði tækniþróunar og nýsköpunar. Sjóðurinn auglýsir umsóknarfresti um framlög og umsækjendur geta verið einstaklingar, fyrirtæki, rannsóknarstofnanir og háskólar.

Rannsóknasjóður hefur það hlutverk að styðja nýsköpun í íslensku atvinnulífi með því að efla tækniþekkingu, rannsóknir og þróunarstarf. Hann varð til með samruna Vísindasjóðs og Tæknisjóðs árið 2003. Hægt er að sækja um undirbúningsstyrki vegna alþjóðasóknar, kynningastyrki, forverkefnisstyrki og styrki til þess að sækja um einkaleyfi, og er umsóknarfrestur opinn.

Nýsköpunarsjóður atvinnulífsins
Nýsköpunarsjóður atvinnulífsins er áhættufjárfestir sem tekur virkan þátt í þróun og vexti atvinnulífsins með því að fjárfesta í vænlegum nýsköpunar- og sprotafyrirtækjum.

Hlutafjárþátttaka
Meginstarfsemi Nýsköpunarsjóðs felst í kaupum á hlutafé í nýsköpunar- og sprotafyrirtækjum en fyrir framlag sjóðsins eignast hann hlutdeild í fyrirtækinu í samræmi við það verðmat sem eigendur viðskiptahugmyndarinnar og Nýsköpunarsjóður koma sér saman um.

Lán með breytirétti
Nýsköpunarsjóður getur veitt nýsköpunar- og sprotafyrirtækjum lán með breytirétti í hlutafé.
Lánin eru veitt til áhugaverðra fjárfestingakosta, þar sem ekki er talið tímabært að leggja fram hlutafé í viðskiptahugmyndina og einnig til fyrirtækja sem sjóðurinn hefur þegar fjárfest í og vill ekki auka hlut sinn í félaginu að svo stöddu.

Frumtak
Markmið Frumtaks er að byggja upp öflug fyrirtæki sem geta verið leiðandi á sínu sviði og um leið skilað góðri ávöxtun til fjárfesta. Frumtaki er ætlað að fjárfesta í fyrirtækjum sem eru komin af klakstigi og er áskilið að fyrir liggi ítarlegar viðskiptaáætlanir. Frumtaki er heimilt að fjárfesta erlendis að því marki sem nauðsynlegt er vegna útrásar eða markaðssóknar íslenskra fyrirtækja á erlenda markaði, ekki síst þegar möguleiki er á sameiningu eða samruna við fyrirtæki í eigu Frumtaks.

Aðrir styrkir og stuðningsaðilar

Hér fyrir neðan eru upplýsingar um ýmsa aðila sem koma að upplýsingagjöf, fjárfestingum, styrkjum eða lánveitingum. Athugið að þessi listi er ekki tæmandi en getur gefið vísbendingar um hvar hægt er að leita aðstoðar. Ábendingar um aðila sem þú telur að ættu að vera á listanum eru vel þegnar.

AVS rannsóknasjóður í sjávarútvegi
AVS rannsóknasjóður starfar á vegum sjávarútvegsráðuneytisins og veitir styrki til rannsóknaverkefna, sem auka verðmæti sjávarfangs. Styrkir eru veittir til verkefna sem taka á öllum þáttum sjávarútvegs og fiskeldis. Styrkir AVS rannsóknasjóðs eru til hagnýtra rannsókna og ætlaðir einstaklingum, fyrirtækjum, rannsókna-, þróunar- og háskólastofnunum.

Framleiðnisjóður landbúnaðarins
Styrki úr sjóðnum má veita til einstakra bænda eða ábúenda á lögbýlum, vinnslustöðva, félaga bænda og vísindastofnana. Sjóðnum er ætlað að efla og auka fjölbreytni atvinnulífs í sveitum og til eflingar nýrra búgreina, markaðsöflunar og til fjárhagslegrar endurskipulagningar búrekstrar og búháttabreytinga á lögbýlum. Sjóðurinn styður bændur og samtök þeirra við stofnun fyrirtækja. Framleiðnisjóður annast nú styrkveitingar sem áður féllu undir Smáverkefnasjóð landbúnaðarins.

Nýsköpunarsjóður námsmanna

Markmið sjóðsins er að gefa háskólum, rannsóknastofnunum og fyrirtækjum tækifæri til að ráða námsmenn í háskólanámi til að vinna á sumarmisseri að rannsóknar- og þróunarverkefnum. Einstaklingar, stofnanir og fyrirtæki geta sótt um styrki.

Orkusjóður
Orkusjóður er eign ríkisins og ber það ábyrgð á skuldbindingum hans. Yfirumsjón með sjóðnum er í höndum iðnaðarráðherra. Orkustofnun annast daglega umsýslu Orkusjóðs. Hjá Orkustofnun starfar orkuráð, sbr. 6. gr. laga um Orkustofnun, sem gerir tillögur til ráðherra um lánveitingar og greiðslur úr Orkusjóði. Sjá nánar reglugerð um Orkusjóð.

Atvinnuleysistryggingasjóður

Atvinnuleysistryggingasjóður býður upp á ýmis vinnumarkaðsúrræði. Meðal annars geta einstaklingar átt rétt á atvinnuleysisbótum við þróun eigin viðskiptahugmyndar. Starfandi fyrirtæki geta nýtt sér verkefnið Starfsorku, sem auðveldar fyrirtækjum að ráða fólk í atvinnuleit til starfa við nýsköpun og þróun.

Atvinnuþróunarfélög
Atvinnuþróunarfélögin hafa það sem eitt af markmiðum sínum að styðja við frumkvöðlastarf í sínu heimahéraði. Atvinnuþróunarfélög starfa á allmörgum stöðum á landinu.

Hönnunarsjóður Auroru
Aurora velgerðarsjóður hefur stofnað Hönnunarsjóð Auroru og veitt til hans 25 milljónum í þrjú ár, eða alls 75 milljónum. Þetta er þriggja ára tilraunaverkefni sem hefur að markmiði að skjóta styrkum stoðum undir íslenska hönnun með því að veita hönnuðum fjárhagslega aðstoð.

Styrkir til atvinnumála kvenna

Tilgangur styrkveitinga er einkum:

Vinnumarkaðsaðgerðir til að draga úr atvinnuleysi meðal kvenna
Viðhalda byggð um landið
Auðvelda aðgang kvenna að fjármagni
Auka fjölbreytni í atvinnulífi

Ferðamálastofa

Ferðamálastofa annast skipulagningu og áætlanagerð um íslensk ferðamál auk ýmissa annarra verkefna er lúta að ferðamálum. Bróðurparti þeirra fjármunanna sem varið er til umhverfismála af hálfu stofnunarinnar er nú úthlutað í styrkjaformi. Að jafnaði er auglýst eftir styrkjum einu sinni á ári (í kringum áramót) og skiptist upphæðin í þrjá meginflokka. Í fyrsta lagi eru styrkir til minni verkefna. Jafnan er lögð áhersla á einn tiltekin málaflokk á hverju ári (t.d. gönguleiðir, aðgengismál fatlaðra, o.s.frv.). Í öðru lagi eru styrkir til stærri verkefna á fjölsóttum ferðamannastöðum. Í þriðja lagi eru veittir styrkir til uppbyggingar á nýjum svæðum.

Styrkir vegna starfsmenntunar í atvinnulífinu

Rétt til að sækja um styrk eiga: Samtök atvinnurekenda og launafólks, einstök fyrirtæki, einkaaðilar eða opinberir aðilar sem standa fyrir starfsmenntun í atvinnulífinu, starfsmenntaráð einstakra atvinnugreina og samstarfsverkefni á vegum tveggja eða fleiri framangreindra aðila. Umsóknir frá skólum koma aðeins til greina þegar um er að ræða samstarf við framangreinda aðila, einn eða fleiri.

Byggðastofnun
Stofnunin fylgist með og gerir áætlanir um þróun byggðar og atvinnulífs í þeim tilgangi að treysta búsetu í byggðum landsins. Stofnunin vinnur náið með atvinnuþróunarfélögum landshlutanna. Stofnunin veitir lán vegna fjárfestinga í atvinnulífi á landsbyggðinni. Byggðastofnun hefur umsjón með starfi atvinnuráðgjafa á landsbyggðinni. Hjá stofnuninni er að finna mikið magn upplýsinga um byggð og atvinnulíf.

Bændasamtök Íslands

Bændasamtök Íslands eru forystuafl og samnefnari landbúnaðar á Íslandi. Markmið samtakanna er að standa vörð um hagsmuni bænda og kjör og skapa þeim félagslegan vettvang og að skipuleggja og veita bændum, búnaðarsamböndum/leiðbeiningastöðvum faglega ráðgjöf og stuðning, sem miðar að bættum árangri í búrekstri, þannig að landbúnaðurinn verði í senn samkeppnishæfur og fjárhagslega arðbær.

Einkaleyfastofa

Hlutverk Einkaleyfastofu er að fara með málefni varðandi einkaleyfi, vörumerki, hönnunarvernd, byggðarmerki og önnur hliðstæð réttindi sem kveðið er á um í lögum, reglugerðum og alþjóðasamningum um vernd eignarréttinda á sviði iðnaðar. Einkaleyfastofan tekur við umsóknum um einkaleyfi, hefur milligöngu um rannsókn á þeim og metur hvort einkaleyfi skuli veitt. Stofan sér jafnframt um að veita einstaklingum, stofnunum og atvinnufyrirtækjum upplýsingar og ráðgjöf varðandi hugverkaréttindi í iðnaði og stuðla að því að ný tækni og þekking sem felst í skráðum hugverkaréttindum verði aðgengileg almenningi.

Enterprise Europe Network

Impra á Nýsköpunarmiðstöð Íslands leiðir starfsemi Enterprise Europe Network á Íslandi en Útflutningsráð og Rannís eru samstarfsaðilar hennar. Enterprise Europe Network (EEN) hefur það að markmiði að aðstoða lítil og meðalstór fyrirtæki, rannsóknaraðila, opinberar stofnanir og háskóla við að efla samkeppnishæfni sína á alþjóðamarkaði. Starfsemi Enterprise Europe Network snýst um að efla stoðkerfi nýsköpunar sem er mikilvægt fyrir hagvöxt þjóða. Ennfremur mun ætlunin að stuðla að aukinni vitund um lög og reglugerðir Evrópusambandsins, bjóða upp á vettvang á netinu fyrir alþjóðlega samvinnu, aðstoða innlenda aðila við að taka þátt í evrópskum verkefnum og nálgast fjármagn sem og skipuleggja samvinnu milli landa. Þannig styrkir Enterprise Europe Network alþjóðlegt samstarf og aðstoðar fyrirtæki við að nýta sér tækifæri sem bjóðast innan Evrópu

Fjárfestingarstofan

Fjárfestingarstofan - Invest in Iceland Agency - hefur það hlutverk að laða til landsins erlenda fjárfesta, í því skyni að auka fjölbreytni atvinnulífsins. Hún miðlar upplýsingum til erlendra fjárfesta og kemur þeim í samband við viðeigandi aðila á Íslandi, hefur frumkvæði að samkeppnisgreiningu einstakra atvinnugreina, fylgist með rannsóknum, þróun og nýjum tækifærum og veitir stjórnvöldum og atvinnulífi ráðgjöf. Einnig sér Fjárfestingarstofan um verkefnið Film in Iceland, http://www.filminiceland.com/.

Hagstofa Íslands

Hagstofan starfar eftir lögum um þjóðskrá og almenningsskráningu og ýmsum öðrum lögum. Þá starfar hún í samræmi við samþykktir Sameinuðu þjóðanna um grundvallarreglur um opinbera hagskýrslugerð. Atvinnu- og fyrirtækjasvið fæst við hagskýrslugerð um vinnumarkað, fyrirtæki og framleiðslu, verðlag og laun. Þar er mikið magn talnaefnis sem nýtist við markaðsrannsóknir fyrirtækja.

Landsamband íslenskra útvegsmanna (LÍÚ)

Landsamband íslenskra útvegsmanna hefur það hlutverk að vera opinber málsvari fiskiskipaeigenda og stuðla að framförum á sviði fiskveiða. Sambandið er einnig í forsvari við rekstur og einstakra mála fyrir dómi er snerta sérstaklega hagsmuni og réttindi félagsmanna.

Pokasjóður Verslunarinnar
Pokasjóðurinn hefur verið starfræktur frá árinu 1995 eða í rúmlega 7 ár. Á þessum tíma hefur sjóðurinn úthlutað samtals rúmum 220 milljónum til verkefna á sviði umhverfismála og mannúðarmála. Þann 1. janúar 2002 varð sú breyting á að nafni sjóðsins var breytt í Pokasjóður verslunarinnar og um leið fékk sjóðurinn nýtt hlutverk. Pokasjóður mun ekki eingöngu úthluta fé til umhverfismála heldur einnig til annarra verkefna sem heyra undir almannaheill. Má þar nefna verkefni eins og menningu, listir, íþróttir og mannúðarmál.

Rannsóknarþjónusta Háskólans

Starfsemi Rannsóknaþjónustunnar er í meginatriðum þríþætt: Í fyrsta lagi er veitt margvísleg þjónusta við alþjóðlegt rannsókna- og menntasamstarf. Í öðru lagi er stuðlað að hagnýtingu rannsóknaniðurstaðna. Í þriðja lagi rekur stofnunin fyrirtæki tengd Háskóla Íslands og önnur verkefni. Einnig starfrækir hún skrifstofur sem veita þeim þjónustu sem taka þátt í Evrópusamstarfi. Þessar þjónustuskrifstofur eru lykilatriði í rekstri Rannsóknaþjónustunnar og tryggja að hún sé í lifandi tengslum við fyrirtæki, skóla, fræðsluaðila og einstaklinga víðsvegar í þjóðfélaginu.

Ríkisskattstjóri

Ríkisskattstjóri starfrækir fyrirtækjaskrá og heldur einnig hlutafélagaskrá. Þetta voru áður hlutverk Hagstofu Íslands. Fyrirtækjaskráin inniheldur öll einkahlutafélög og hlutafélög sem til eru skráð á Íslandi. Upplýsingar um samvinnufélög og sjálfseignarstofnanir í atvinnurekstri eru einnig til staðar. Þar fer jafnframt fram nýskráning hlutafélaga, einkahlutafélaga, sjálfseignarstofnana í atvinnurekstri og samvinnufélaga fer fram hjá ríkisskattstjóra, fyrirtækjaskrá. Allt sem tengist skatti á einhvern hátt fer að sjálfssögðu í gegnum ríkisskattstjóra og má finna allar upplýsingar um þau mál á heimasíðu hans. Þar má einnig finna gjaldskrár og umsóknareyðublöð, sem tengjast stofnun fyrirtækja og félaga, ásamt öllum mögulegum skattaeyðublöðum.

Samstarfsvettvangur sjávarútvegs og iðnaðar

Hlutverk Samstarfsvettvangs sjávarútvegs og iðnaðar er að leiða saman fyrirtæki í sjávarútvegi og iðnaði í þeim tilgangi að efla þróun á tækjabúnaði sem eykur vinnsluvirði í útgerð og fiskvinnslu. Vettvangurinn veitir fyrirtækjum faglega og fjárhagslega aðstoð til að auðvelda þróunarstarfið. Ávinningur fyrirtækja sem fá stuðning frá Samstarfsvettvanginum er meðal annars fólginn í aðstoð við að beita markvissum vinnubrögðum til þess að stytta þróunartímann og minnka fjárhagslega áhættu. Samstarfsvettvangur sjávarútvegs og iðnaðar er opinn öllum iðn- og sjávarútvegsfyrirtækjum auk annarra þeirra sem vinna að markmiðum hans.

SA- Samtök atvinnulífsins

Samtök atvinnulífsins eru heildarsamtök íslenskra atvinnurekenda sem hafa það meginmarkmið að skapa fyrirtækjum hagstæð skilyrði til að vaxa, þróast og bera arð. Samtökin eru stofnuð til þess að halda fram sjónarmiðum atvinnurekenda og veita fyrirtækjum á Íslandi margvíslega þjónustu. Samtökin kappkosta að veita félögum góða þjónustu og að vera öflugur málsvari atvinnulífsins í landinu.

SART-Samtök atvinnurekenda í raf- og tölvuiðnaði

Tilgangur SART er meðal annars að tengja saman atvinnurekendur í raf- og tölvuiðnaði á Íslandi og koma fram fyrir þeirra hönd gagnvart almenningi og hinu opinbera. Þau eru einnig aðildarfélögum og einstökum félagsmönnum til leiðbeiningar og aðstoðar um allt er snertir félagslega starfsemi og atvinnurekstur, og þau vinna að aukinni menntun og bættum starfsskilyrðum. Einnig vinna þau að því að sem mest samræmi verði í afstöðu félagsmanna og hinna einstöku aðildarfélaga varðandi hagsmunamál þeirra, launa- og kjaramál og reglugerðir.

SAF-Samtök ferðaþjónustunnar

Samtök ferðaþjónustunnar eru hagsmunasamtök allra fyrirtækja sem starfa í ferðaþjónustu. Samtökin voru byggð á grunni Sambands veitinga- og gistihúsa og lögðu önnur hagsmunasamtök sem störfuðu innan ferðaþjónustunnar niður starfsemi sína á sama tíma. Meginhlutverk SAF er að gæta sameiginlegra hagsmuna félagsmanna sinna, vinna að því að fyrirtækin búi við starfsskilyrði sem gera þau samkeppnishæf á alþjóðamarkaði og vinna að vexti og viðgangi greinarinnar með öllum tiltækum ráðum.

SF- Samtök fiskvinnslustöðva

Tilgangur samtakanna er meðal annars að sameina í ein hagsmunasamtök öll fyrirtæki sem vinna að framleiðslu og/eða sölu sjávarafurða og vera málsvari þeirra út á við. Þau vernda rétt félagsmanna sinna og reyna að koma í veg fyrir verkföll og verkbönn, og þau gæta hagsmuna íslenskrar fiskvinnslu að því er varðar samkeppnisstöðu, samninga og samskipti Íslands og annarra ríkja eða ríkjabandalaga.

SFF- Samtök fjármálafyrirtækja

Tilgangur samtakanna er að vera málsvari aðildarsambanda (sérgreinasambanda) og félaga (fyrirtækja) þeirra í almennum hagsmunamálum þeirra, og að vinna að sameiginlegum hagsmunamálum aðildarsambanda (sérgreinasambanda) og félaga (fyrirtækja) þeirra. Þau þjónusta einnig aðildarsambönd og félög þeirra í kjaramálum.

SI- Samtök iðnaðarins

Samtök iðnaðarins eru málsvari atvinnugreinarinnar í stóru sem smáu. Þau leggja áherslu á að iðnaðinum séu búin góð starfsskilyrði og berjast fyrir hagsmunum hans á öllum sviðum. Samtökin vinna einnig að kynningu og markaðsmálum iðnaðar, nýsköpun og þróun, gæðastjórnun, umhverfismálum o.fl. Þau reyna einnig að hafa áhrif á stefnu stjórnvalda, fjármálastofnana, opinberra stofnana og annarra sem tengjast starfsemi iðnaðarins, með það að markmiði að íslenskum fyrirtækjum verði búin starfsaðstaða sem gerir þau samkeppnishæf á innlendum og erlendum mörkuðum, án hindrana og með arðbærum hætti. Rík áhersla er einnig lögð á að menntun starfsfólks og stjórnenda í iðnaði sé eins góð og kostur er og að hún stuðli að eðlilegri tækniþróun og falli að þörfum hans.

SVÞ- Samtök verslunar og þjónustu

Tilgangur samtakanna er að vera málsvari atvinnurekenda á sviði verslunar og þjónustu og að vinna að almennum og sameiginlegum hagsmunamálum aðildarfyrirtækja. Þau stuðla einnig að framförum í verslun og þjónustu, bættum starfsskilyrðum, aukinni arðsemi og samkeppnishæfni. Þau þjónusta einnig aðildarfyrirtæki sín á sviði kjaramála í samstarfi við Samtök atvinnulífsins (SA).

Útflutningsráð Íslands

Útflutningsráð Íslands veitir íslenskum fyrirtækjum faglega aðstoð við kynningu og sölu á vörum, þjónustu og þekkingu erlendis. Þjónusta Útflutningsráðs er margþætt en hún felur í sér miðlun markaðsupplýsinga, ráðgjöf og fræðslu um markaðssókn erlendis, umsjón með þátttöku í sýningum og skipulagningu á ferðum viðskiptasendinefnda. Útflutningsráð er aðili að Enterprise Europe Network sem er stuðningsnet ESB fyrir lítil og meðalstór fyrirtæki. Fjárfestingarstofan er rekin af Útflutningsráði og iðnaðarráðuneytinu og hefur aðsetur á skrifstofu Útflutningsráðs. Útflutningsráð er jafnframt stofnaðili ÚTÓN, Útflutningsskrifstofu íslenskrar tónlistar, ásamt Samtóni og Landsbanka Íslands. Skrifstofa ÚTÓN er hjá Útflutningsráði.

Viðskiptaráð Íslands

Viðskiptaráð Íslands eru heildarsamtök fyrirtækja og einstaklinga í öllum greinum
viðskiptalífsins. Verslunarráðið, sem er hlekkur í keðju 11.000 verslunarráða um heim allan, hefur einstaka aðstöðu á sviði alþjóðamála. Þetta alþjóðlega samstarf veitir ráðinu aðgang að hagnýtum upplýsingum og ýmissi aðstoð.

Viðskiptaráðið veitir margvíslega þjónustu fyrir fyrirtæki. Það sér um útgáfu upprunavottorða og Ata-Carnet skírteina fyrir útflytjendur og veitir upplýsingar um innlend og erlend fyrirtæki. Á skrifstofu VÍ liggja frammi viðskiptahandbækur og diskar frá ýmsum löndum. Margvísleg önnur þjónusta býðst aðildarfyrirtækjum Verslunarráðsins sérstaklega.

VUR- Viðskiptaþjónusta utanríkisráðuneytisins

Starfsemi viðskiptaskrifstofu utanríkisráðuneytisins tekur m.a. yfir samskipti Íslands við alþjóðleg viðskiptasamtök og efnahags- og fjármálastofnanir, undirbúning, gerð og framkvæmd viðskiptasamninga við erlend ríki og samstarf við stofnanir og hagsmunasamtök á sviði útflutningsviðskipta. Viðskiptafulltrúarnir hafa liðsinnt fjölmörgum við leit að samtarfsaðilum, könnun á markaðsaðstæðum og skipulagningu heimsókna auk þess að hafa vísað á ný markaðstækifæri og beint athyglinni að íslenskum fyrirtækjum við margs konar tækifæri.

Vinnumálastofnun

Vinnumálastofnun, heyrir undir félagsmálaráðherra, og fer m.a. með yfirstjórn vinnumiðlunar í landinu og daglega afgreiðslu Atvinnuleysistryggingasjóðs. Stofnunin úthlutar styrkjum til atvinnumála kvenna þar sem allar konur hvaðanæva af landinu geta sótt um styrk og einnig úthlutar hún styrkjum til starfsmenntunar í atvinnulífinu.

Kísilgúrsjóður Atvinnuþróunarfélags Þingeyinga
Kísilgúrsjóður er sjóður sem stofnaður var til að vinna að uppbyggingu atvinnuvega í þeim sveitarfélögum sem eiga mikið undir rekstri Kísiliðjunnar hf. Í sjóðinn kemur árlega fjármagn samkvæmt fjárlögum annarsvegar og hluti af námagjaldi Kísiliðjunnar hinsvegar. Úthlutanir Kísilgúrsjóðs eru tvennskonar þ.e. styrkveitingar og kaup á hlutafé í fyrirtækjum.

Atvinnuþróunarsjóður Austurlands
Sjóðurinn hefur þann tilgang að stuðla að þróun og eflingu atvinnulífs á Austurlandi með kaupum á hlutafé í fyrirtækjum, lánveitingum og úthlutun styrkja.

Frumkvöðlasetur

Frumkvöðlasetur Nýsköpunarmiðstöðvar
Fjögur setur eru starfrækt í Reykjavík (Torgið, Kvosin, Heilsutæknigarðar og Keldnaholt) auk setra í Hafnarfirði, á Hornafirði, Eldey á Keilissvæðinu og Ísafirði.

Klak
Klak er sjálfstætt nýsköpunarhús sem rekið er innan vébanda HR. Í boði er skrifstofuaðstaða fyrir frumkvöðla og ráðgjöf um stofnun og rekstur nýrra fyrirtækja, auk þess sem Klakið stendur fyrir námskeiðum í samstarfi við Opna háskólann í HR, meðal annars undir merkjum Viðskiptasmiðjunnar.

Innovit
Innovit er sjálfstætt starfandi nýsköpunar- og frumkvöðlasetur fyrir. Megináhersla er lögð á að styðja við háskólamenntaða frumkvöðla og sprotafyrirtæki sem verða til innan íslenskra háskóla. Í því skyni hefur Innovit gert samstarfs- og þjónustusamninga við Háskóla Íslands, Háskólann í Reykjavík, viðskiptafræðideild Háskólans á Bifröst og Keili sem tryggir nemendum skólanna aðgang að þjónustu Innovit endurgjaldslaust, allt frá því að nám hefst og þar til fimm árum eftir útskrift.

V6 Sprotahús
Sjálfstætt starfandi setur í Mosfellsbæ.