Um BG fyrirtæki í fjölmiðlum

Það er alltaf gaman fyrir okkur hjá Nýsköpunarmiðstöð Íslands að fylgjast með velgengni þeirra kvenna sem setið hafa Brautargengisnámskeið hjá okkur. Fjöldi kvenna hefur í gegnum tíðina útskrifast af námskeiðinu og er vel ríflega helmingur þess fjölda í dag með eigið fyrirtæki í rekstri eða að undirbúa stofnun fyrirtækis.

Sif Sigfúsdóttir Brautargengiskona Þann 13. maí 2011 birtist viðtal við Sif Sigfúsdóttur, frumkvöðul og Brautargengiskonu. Hún opnaði í lok mars mánaðar viðburðavefinn www.gerumeitthvad.is sem ætlaður er fyrir alla fjölskylduna. Á vefnum er á auðveldan máta hægt að sjá á einum stað hvað í boði er í stað þess að þurfa að opna heimasíður fjölda fyrirtækja og stofnana. Meðal þess sem nú ber hæst á viðburðavefnum er Barnavagnavika Ferðafélags Íslands, útskriftartónleikar úr Listaháskóla íslands, fjöruganga við Bessastaðakirkju og nytjamarkaður í Súðavogi í Reykjavík þar sem allur ágóðinn rennur til ABC barnahjálpar.

Vefsíðan er nýsköpunarverkefni Sifjar á Brautargengisnámskeiði, sem er sérsniðið fyrir athafnakonur sem hafa viðskiptahugmynd sem þær vilja hrinda í framkvæmd. Hún hafði gengið með hugmyndina í maganum í tvö ár þegar hún loksins varð að veruleika.

Sjá frétt í heild sinni á Vísi eða hér

Fréttablaðið 22. janúar

Sígilt og endingargott

"Ég held mikið upp á þessa flík sem er eins konar anorakkur eða mussa. Hún var keypt í Danmörku í Henrik Vibskov-verslun síðasta sumar, en þetta er hans hönnun," segir Svanhildur Einarsdóttir, kennari og verslunareigandi. "Ég nota anorakkinn mikið og við mörg tækifæri," segir hún en fjölbreytt notagildi heillaði hana á sínum tíma.

"Hægt er að nota flíkina bæði úti og inni. Einfalt er að klæða sig í eitthvað hlýtt undir en annars er ég stundum í úlpu yfir," segir Svanhildur brosandi og bætir við að flíkin henti vel við íslenskar aðstæður þar sem allra veðra er von. "Ég er mikið í þægilegum fötum og upp á síðkastið hef ég oft klæðst dökkum fötum. Ég heillast líka af sígildum fatnaði sem nota má við ýmis tækifæri," segir hún.

Uppáhaldsverslanir Svanhildar á Íslandi eru Kronkron og KVK. "Þar má finna vönduð og endingargóð föt en það líkar mér. Síðan vil ég hafa fötin mín straufrí, ég nota ekki mikið föt sem þarf að strauja," segir hún og hlær. Svanhildur viðurkennir að henni þyki skemmtilegt að klæðast öðruvísi fötum. "Oft er ég þó í ósköp venjulegum fötum svona hversdags en krydda þetta þó af og til."

Svanhildur hefur lengi haft áhuga á fatnaði og á til að mynda barnafataverslunina Rumputusku á Laugavegi 27. "Búðin er um ársgömul og þar má finna mjög litskrúðug dönsk og sænsk gæðaföt. Ég er meðal annars með föt úr lífrænni bómull og hefur sú framleiðsla verið að aukast. Þá er líka verið að hugsa um umhverfið í allri framleiðslu. Er þá til dæmis horft til þess að pakkningar séu umhverfisvænar og að barnaþrælkun tengist ekki framleiðslunni," útskýrir hún. Misjafnt er þó hversu meðvitaðir neytendur eru um þessa hluti. "Flestir eru ekki mikið að spá í þetta en þó kemur það fyrir. Þó hefur áhuginn verið smám saman að aukast," segir Svanhildur og bætir við að öll fötin séu eiturefnaprófuð og endist vel.

Fimmtudaginn 22. janúar 2009 hrefna@frettabladid.is

Morgunblaðið 2. nóvember

Aðalbjörg er ein af þeim
sem orku kann að brúka,
hún trítlar inn í töfraheim
til að lækna sjúka.

Þannig orti Kristján Hreinsson skerjaskáldum Aðalbjörgu Þorsteinsdóttur, forsprakka sprotafyrirtækisins Villimeyjar á Tálknafirði.
Snemma vaknaði áhugi Aðalbjargar á jurtum og áhrifamætti þeirra. Nálægðin við stórbrotna náttúru Vestfjarða hafði áhrif á það að frá blautu barnsbeini hefur Aðalbjörg trúað á töframátt jurtanna. Hún hefur frá árinu 1990 þróað og framleitt smyrsl, salva og áburði úr plöntum sem hún tínir á heimaslóðum sínum við Tálknafjörð og einnig á stórum svæðum við Patreksfjörð og Arnarfjörð.
„Ég byrjaði á því að gera smyrsl og seyði fyrir fjölskyldu og vini og var hvött til að halda áfram þar sem virkni var svo mikil. Ég var heldur spéhrædd í fyrstu en lét til leiðast," segir Aðalbjörg. Árið 2002 kynnti hún vöruna fyrst opinberlega og frá 2005 hefur hún verið fáanleg í verslunum víðsvegar um land. „Viðtökur hafa verið vonum framar," segir hún. Smyrslin frá Villimey eru 100% náttúruleg, unnin úr íslenskum jurtum sem eru handtíndar í hreinni náttúru
Vestfjarða þegar virkni þeirra er hvað mest. Þau eru án allra rotvarna-,ilm- og litarefna og Villimey hefur fengið lífræna vottun hjá Vottunarstofunni Tún. „Það er mikill gæðastimpill. Ég er líka með stærsta vottaða landsvæði á Íslandi," segir Aðalbjörg hróðug. Útflutningur á döfinni Fjórir starfa hjá Villimey í dag, þar af tveir í fullu starfi og
Aðalbjörg segir áform um að færa út kvíarnar enn frekar.
„Næsta skrefið er útflutningur og ég vonast til að hann geti hafist á næsta ári. Gangi það eftir gæti fyrirtækið stækkað hratt."
Hún segir staðsetningu Villimeyjar hafa sína kosti og galla. „Kosturinn er sá að ég hef aðgang að úrvalshráefni hérna fyrir vestan en á móti
kemur að ég er býsna langt frá markaðinum."
Aðalbjörg segir ekki heiglum hent að setja á laggirnar sprotafyrirtæki
á Íslandi. „Ég hef lagt allt mitt undir, alla mína orku, alla mína vinnu. Oft hef ég verið við það að bugast en þá hefur komið símtal frá ánægðum viðskiptavini og ég hert upp hugann. Viðbrögðin eru mjög gefandi."
Aðalbjörg skilur mætavel að fyrirtæki þurfi að sanna sig til að
fá stuðning en þegar þau hafa gert það mætti gatan að hennar mati
vera greiðari. „Ég hef þó á tilfinningunni að skilningur sé að
aukast."

Morgunblaðið 2. nóvember

Styður fólk í eigin umhverfi

Gunnhildur Heiða Axelsdóttir stofnaði ráðgjafarog þjónustufyrirtækið Vinun fyrir um ári síðan en er strax komin með 30 manns í vinnu. Vinun býður uppá þjónustu við fólk sem þarfnast aðstoðar vegna veikinda, slysa eða öldrunar. Gunnhildur Heiða vann lengi á Svæðisskrifstofu málefna fatlaðra og fékk þar góða innsýn í málaflokkinn auk þess að vera menntuð í uppeldis- og menntunarfræðum frá Kennaraháskóla Íslands með áherslu á
þroskaþjálfun og fötlunarfræði frá Háskóla Íslands „Það að skilgreina alla þjónustu sem fatlaðir eiga að fá sem hjúkrunarumönnun kemur í veg fyrir að
fólk fái þá þjónustu sem það þarf til að búa heima,“ segir Gunnhildur Heiða, sem vill bregðast við þessu með Vinun. „Við afnemum allar þessar skilgreiningar og leggjum áherslu á að veita fólki alla þá þjónustu sem það þarf á þeim tíma sem það þarf hana,“ segir hún en nánari upplýsingar er að finna á vinun.is.
„Við höfum verið að hjálpa fólki að fá gerða við sig þjónustusamninga
og útvegum því starfsmann, sem kemur inn á heimili fólks á þess forsendum og það ákveður í hvað það vill nota þessa aðstoð sína,“ segir Gunnhildur Heiða en
eins og kerfið virkar núna er þjónustan bundin við afmarkað svið, til dæmis böðun einu sinni í viku, hjálp í og úr rúmi og þrif á íbúð einu sinni í viku.
„Aldraðir á Íslandi fara þremur til fimm árum fyrr inn á hjúkrunarheimili en á hinum Norðurlöndunum en það er vegna þess að það er ekki lögð nógu mikil áhersla á þjónustu heim til fólks,“ segir hún ennfremur. Stækkun og sveigjanleg
þjónusta „Við höfum þjónustuna sveigjanlega og fólk getur keypt þjónustu
hluta úr degi eða alla daga vikunnar og þá skiptir ekki máli á hvaða tíma dags það er,“ segir Gunnhildur Heiða, sem sér fram á frekari stækkun fyrirtækisins.
„Ég á von á því að geta fjölgað starfsmönnum verulega, þar sem það er það stór hópur, sem býr heima og er að bíða eftir hjúkrunarplássi. Þessum hópi þarf að
sinna og það er hægt að bæta lífsskilyrði hans mikið,“ segir hún og ítrekar að sér finnist of mikil áhersla lögð á stofnanamiðuð úrræði. „Þegar fólk er komið á hjúkrunarheimili tapar það svo miklum lífsgæðum. Þá ræður þú til dæmis ekki lengur á hvaða tíma dags þú færð kaffi eða ferð að sofa. Vinun er að svara ákveðinni þörf. Við erum að bjóða fólki uppá meiri lífsgæði og aukið frelsi með því að búa á eigin heimili með öruggri þjónustu,“segir hún en á meðal þeirra
sem starfa hjá Vinun eru félagsliðar, sjúkraliðar og hjúkrunarfræðingar. „Fólk þarf að fá stuðning frá ríkinu eða borginni til að kaupa sér þjónustu heim því þegar allt kemur til alls sparar það kerfinu mikinn pening,“ segir hún og tekur dæmi um ungling sem var útskrifaður af BUGL fyrir tilstilli fyrirtækisins.
„Sólarhringur á BUGL kostar 90 þúsund krónur. Kerfið
sameinaðist um það að borga honum 150 þúsund krónur á mánuði til að styðja hann í eigin umhverfi. Þessi unglingur var útskrifaður til okkar frá BUGL á sínum tíma.“

Fréttablaðið 26. október

Klausturvörur
Í versluninni Klausturvörum er að finna matvöru, listmuni og snyrtivörur sem framleiddar eru í klaustrum víða í Evrópu.
Til dæmis er hunang þar í miklu úrvali og má í því samhengi nefna möndlublóma- og kastaníuhunang. Eins er mikið af sultum, bæði hefðbundnum og óvenjulegum. Til að mynda eru til sultur með apríkósum og möndlum, fíkjum og
hunangi og meira að segja jarðarberjasulta með grænum pipar. Þá er til ávaxtahlaup frá Bretlandi í misstórum gjafaumbúðum, franskt súkkulaði, ólífuolía, balsamedik og sinnep. Marianne Guckelsberger, annar
eigandi verslunarinnar, segir klausturvöruverslanir algengar víða erlendis. Fólk setji samasemmerki á milli verslananna og gæða enda eru vörurnar að sögn Marianne lífrænar og umhverfisvænar.
„Í Klausturvöruverslunum er hægt að veita sér eitthvað gott, verða sér úti um gæðavöru og
styðja um leið góðan málstað," segir Marianne en hún kveðst hafa orðið vör við að fólk vilji vita
hvaðan vörurnar sem það kaupir koma. Í Klausturvörum er hægt að ganga að því vísu og hefur
búðin, sem var opnuð fyrir ári, hlotið góðar viðtökur.