Nýsköpunarmiðstöð Íslands býður nú upp á nýtt frumkvöðlanámskeið fyrir ungt fólk sem ber nafnið Fljúgandi fær.

Markmið Fljúgandi fær er að þátttakendur kynnist hugsun og aðferðum frumkvöðla í atvinnulífinu og fái þekkingu á grunnatriðum í stofnun og starfsemi fyrirtækja. Námskeiðinu er einnig ætlað að þjálfa þátttakendur í hópstarfi og vinnubrögðum, efla stjórnunarhæfni og æfa framkomu í kynningarstarfi.

Á námskeiðinu er farið í hvernig hægt er að hrinda hugmyndum í framkvæmd, allt frá hugmyndavinnu, fjármálum og markaðssetningu til framkvæmdar.

Frumkvöðlanámskeiðið Fljúgandi fær er fyrir ungt fólk á efsta stigi grunnskóla og í framhaldsskólum. Boðið er upp á námskeiðið fyrir sveitarfélög og aðra aðila sem vinna með ungmennum.