Býrð þú yfir viðskiptahugmynd sem getur leitt til nýsköpunar í atvinnulífi á landsbyggðinni?  

Þá er frumkvöðlastuðningur eitthvað fyrir þig.

Verkefnið er alltaf opið til umsóknar. 

Umsóknir sem berast fyrir 15. júní verða afgreiddar í júlí. Vegna sumarleyfa verða umsóknir sem berast eftir 15. júní afgreiddar í september.  

Markmið Frumkvöðlastuðnings er að styðja við nýsköpunarhugmyndir einstaklinga og smærri fyrirtækja með því að veita styrki til verkefna sem stuðla að framþróun viðskiptahugmynda.  Með framþróun er átt við verkefni sem snúa að gerð viðskiptaáætlana, nýnæmisathugana, einkaleyfisumsókna, markaðsathugana, rekstrar- og fjárhagsáætlana, hönnunarverndar, hagkvæmnisathugana, þróunar vöru eða þjónustu, prófana og frumgerðarsmíða.

Styrkir eru eingöngu veittir til nýsköpunarverkefna á landsbyggðinni. Getur stuðningur við frumkvöðul numið allt að 600 þús. kr. gegn jafnháu framlagi styrkþega. Ekki eru veittir styrkir til fjárfestinga í húsnæði eða til kaupa á tækjum og búnaði.

Tilgangur verkefnisins
Að draga fram í dagsljósið efnilegar viðskiptahugmyndir sem fela í sér nýsköpun og aðstoða hugmyndasmiðinn við að hrinda þeim í framkvæmd. Hugmyndirnar þurfa að uppfylla eftirfarandi þætti:

• Að hvetja til nýsköpunar í íslensku atvinnulífi.
• Að stuðla að faglegri vinnslu viðskiptahugmynda með arðsemi og kröfur markaðarins að leiðarljósi.
• Að minnka áhættu einstaklinga og lítilla fyrirtækja við að hrinda í framkvæmd hugmyndum sem fela í sér nýsköpun.
• Að nýta það fjármagn sem til ráðstöfunar er á sem bestan hátt þannig að árangur verði sýnilegur í formi nýrra vöru, þjónustu eða fyrirtækja.

Mat umsókna
Umsóknir þurfa að berast Impru á þar til gerðum umsóknareyðublöðum sem nálgast má hér á heimasíðunni, ásamt leiðbeiningum um útfyllingu. Mikilvægt er að vanda útfyllingu umsóknarinnar og fylgja þeim leiðbeiningum sem eru gefnar. Í umsókninni þurfa m.a. að koma fram upplýsingar um framkvæmdaaðila verkefnisins, viðskiptahugmyndina, nýnæmi hennar og væntanlegan árangur.  Allar umsóknir eru metnar af verkefnisstjórn. Við mat verkefna er lögð megináhersla á eftirfarandi:

• Nýnæmi hugmyndarinnar  
• Væntanlegan ávinning eða hagræði af verkefninu
• Mögulega framþróun atvinnugreinarinnar  
• Þátttakandann, þekkingu og tengsl hans við viðfangsefnið og að hugmyndareigandi sé fær um að leiða hugmyndina til hagnýtra nota

Árangur - ávinningur
Nauðsynlegt er að geta metið árangur af hverju verkefni.  Frumkvöðlastyrkir eru greiddir út eftir framvindu verkefnis og með því er í raun byggt inn i verkefnið mat á árangri. Einnig þurfa styrkþegar að skila inn áfanga- og lokaskýrslu.

Annar ávinningur af verkefninu er:

1. Verkefninu er ætlað að draga úr áhættu einstaklinga og fyrirtækja sem fá styrki má ætla að verkefnið stuðli að því að hrinda í framkvæmd hugmyndum sem annars yrðu ekki að veruleika.

2. Verkefnið stuðlar að því að faglega sé unnið að nýjum hugmyndum eftir eðli þeirra og því á hvaða stigi þær eru.

3. Umfjöllun um verkefnið og árangur þess ætti að örva enn frekar nýsköpun meðal einstaklinga.

Nánari upplýsingar um Frumkvöðlastuðning veitir Guðmundur Óli Hilmisson, verkefnisstjóri í síma 522 9433 eða goh@nmi.is.

Umsóknir sem berast fyrir 15. júní verða afgreiddar í júlí. Vegna sumarleyfa verða umsóknir sem berast eftir 15. júní afgreiddar í september. 

Umsóknareyðublöð