Norðursprotar

Býrð þú yfir viðskiptahugmynd sem getur leitt til nýsköpunar á Norðausturlandi? Þá er verkefnið Norðursprotar fyrir þig.

Norðursprotar er fjármagnað af samfélagssjóði Alcoa og unnið í samstarfi Alcoa, Háskólans á Akureyri og Impru á Nýsköpunarmiðstöð.

Markmið Norðursprota er að styðja við nýsköpunarhugmyndir einstaklinga á Norðausturlandi, þ.e.a.s. á svæðinu frá Djúpavogi til og með Eyjafjarðar. Styrkir eru veittir til gerðar viðskiptaáætlunar, eða til frekari þróunar viðskiptaáætlunar, fyrir verkefni sem telja má nýsköpun á Norðausturlandi. Stuðningur við einstaklinga getur numið allt að 400 þús. kr. Verkefnið er hægt að vinna í samstarfi við starfandi fyrirtæki á Norðausturlandi.

Tilgangur verkefnisins

Að hvetja til nýsköpunar í atvinnulífi á Norðausturlandi.
Að styðja við einstaklinga í atvinnuleit sem búa yfir viðskiptahugmyndum og aðstoða þá við að hrinda þeim í framkvæmd.
Að stuðla að faglegri vinnslu viðskiptahugmynda með arðsemi og kröfur markaðarins að leiðarljósi.
Að hvetja atvinnuleitendur til að skapa sér ný atvinnutækifæri.

Umsóknarferli

Rafræn umsókn er á http://impra.sidan.is ásamt leiðbeiningum um útfyllingu. Mikilvægt er að vanda útfyllingu umsóknarinnar og fylgja þeim leiðbeiningum sem eru gefnar.

Mat á umsóknum

Matshópur á vegum Alcoa, Háskólans á Akureyri og Impru á Nýsköpunarmiðstöð metur allar umsóknir út frá eftirfarandi meginþáttum:

Nýnæmi hugmyndarinnar
Væntanlegum ávinningi eða hagræði af verkefninu
Væntanlegum markaði og mögulegri framþróun verkefnisins
Umsækjanda, þekkingu og tengslum hans við viðfangsefnið

Verkefnisstjórar Impru á Nýsköpunarmiðstöð munu veita leiðbeiningar og handleiðslu við ritun viðskiptaáætlunarinnar og/eða annarra verkþátta. Styrkir verða greiddir út í tvennu lagi. Fyrri hluti styrksins verður greiddur þegar verkefnið er hálfnað og síðari hlutinn þegar verkefninu er að fullu lokið.

Umsóknarfrestur er til 15. nóvember 2010.

Nánari upplýsingar veitir Guðmundur Óli Hilmisson, verkefnastjóri Impru á Akureyri í síma 522-9433, goh@nmi.is