Eurostars

Meistaradeild sprotafyrirtækja í Evrópu - fjármögnun fyrir sprotafyrirtæki

Nýsköpunarmiðstöð Íslands og Rannís buðu til opins kynningarfundar um Eurostars-2, möguleika á fjármögnun verkefna sprotafyrirtækja sem stunda sjálf rannsóknir og þróun. Einnig var sagt frá þjónustu Enterprise Europe Network við sprotafyrirtæki. 

Opið er fyrir umsókni í Eurostars, en næst verður umsóknum smalað saman  15. september  2016. 

Dagskrá kynningarfundar. 

 

(glærur af fundinum á pdf formi eru undir nafni viðkomandi fyrirlesara) 

Snæbjörn Kristjánsson, verkfræðingur hjá Nýsköpunarmiðstöð Íslands, landsfulltrúi í stjórn Eurostars fjallaði um umsóknarferlið.  


Herwig Lejsek, framkvæmdastjóri Videntifier Technologies ehf. kynnti nýtt Eurostars hugbúnaðarverkefni:  EVALA  sem er í samvinnu við tvö fyrirtæki í Búlgaríu.  „Cognitive And Semantic Links Analysis and Media Evaluation Platform“


Mjöll Waldorff, verkefnisstjóri hjá Enterprise Europe Network á Íslandi kynnti þjónustu EEN fyrir sprotafyrirtæki (SME´s) og tækifæri til samstarfs erlendis.


Eurostars er áætlun fyrir lítil og meðalstór fyrirtæki í Evrópu sem vinna sjálf að rannsóknum og þróun.


Eurostars-verkefni eru rannsóknar- og þróunarverkefni sem geta verið á hvaða tæknisviði sem er. Þau eiga að vera til almenningsnota en ekki hernaðarnota. Markmið þeirra á að vera þróun á nýrri vöru, ferli og þjónustu. Eurostars-verkefni eru samstarfsverkefni milli a.m.k. tveggja lögaðila frá tveim Eurostars-löndum sem taka virkan þátt í áætluninni. Auk þess er skilyrði að aðalumsækjandinn í verkefninu sé lítið eða meðalstórt fyrirtæki (LMF) sem stundar sjálft rannsóknir og þróun og sé frá einu af Eurostarslöndunum. Fjármögnun verkefnanna er að mestu leyti frá þátttökulöndunum, á Íslandi frá Tækniþróunarsjóði en ESB leggur til viðbótar "top-up" til Eurostars-áætlunarinnar.


Hlutverk þátttakendanna í verkefninu skal vera verulegt eða að a.m.k 50% af verkþáttum verkefnisins sé unnið af þeim. Gert er ráð fyrir að nokkurt jafnræði sé með þátttakendunum og enginn einn aðili verkefnisins vinni meira en 75% af verkefninu.


Eurostars-verkefni eru unnin á forsendum fyrirtækjanna sem eru í forsvari og eru verkefnin nálægt markaði. Verkefnin geta verið að hámarki til 3ja ára og skyldi afrakstur verkefnisins sem vara eða þjónusta vera tilbúin á markað eftir 2 ár frá verkefnislokum. Undantekning frá þessu er fyrir verkefni á sviði heilbrigðistækni eða læknisfræði en þar skulu klínískar rannsóknir hefjast innan 2ja ára frá verkefnislokum.


Þau 34 lönd sem taka virkan þátt í Eurostars-áætluninni eru Austurríki, Belgía, Bretland, Búlgaría, Danmörk, Eistland, Finnland, Frakkland, Grikkland, Ísland, Írland, Ísrael, Ítalía, Króatía, Kýpur, Lettland, Litháen, Lúxembúrg, Malta, Holland, Noregur, Pólland, Portúgal, Rúmenía, Slóvakía, Slóvenía, Spánn, Suður Kórea, Svíþjóð, Sviss, Tékkland, Tyrkland, Ungverjaland og Þýskaland.

Hámarksstuðningur til íslensks hluta Eurostars verkefnis getur orðið

  • 15 m.kr við 1 árs verkefni
  • 30 m.kr við 2ja ára verkefni
  • 45 m.kr við 3ja ára verkefni

Viðurkenndur kostnaður verkefnis er eins og hjá Tækniþróunarsjóði. Stuðningur sjóðsins hvert ár getur aldrei verið meiri en 50% af árlegum heildarkostnaði.


Nánari upplýsingar er að finna á heimasíðu Eurostars, en öll samskipti eru um heimasíðuna, á beinlínuformi og í lokin er umsókn send inn á síðunni.

http://www.eurostars-eureka.eu/

Hægt er að gerast áskrifandi að Eureka fréttabréfinu neðst til hægri á Eureka heimasíðunni. http://www.eurekanetwork.org

 

Nánari upplýsingar um EUROSTARS veitir:

Snæbjörn Kristjánsson, verkfr. landsfulltrúi Eurostars og Evreka (NPC)

Rekstrarstjóri rannsókna og þróunar, Nýsköpunarmiðstöð Íslands

Sími: 522 9372

Netfang: skr@nmi.is