TINC viðskiptahraðallinn

TINC er öflugt hraðalsverkefni fyrir tæknisprota í Silicon Valley sem stendur yfir í fjórar vikur

Þetta er einstakt tækifæri til að sannreyna viðskiptamódel og möguleika vöru á alþjóðlegum markaði, með minni áhættu, á styttri tíma og með minni tilkostnaði.

Fyrirtækin sem verða valin þurfa að standa undir kostnaði við ferðir og uppihald tveggja starfsmanna í fjórar vikur í Bandaríkjunum, en fá jafnframt myndarlegan styrk. Styrkurinn stendur undir sjálfu námskeiðsgjaldinu, sem er umtalsvert fyrir hvern þátttakanda. 

Nánar um TINC

Markmið hraðalsins er að veita tæknisprotum aðgang að þekkingu og reynslu sem gerir þeim kleift að vaxa hraðar og með minni áhættu. 

Verkefnið er í boði fyrir íslensk, norsk, finnsk, og sænsk fyrirtæki sem hafa þróað tæknilausn sem hefur sannað sig á markaði og er  tilbúin fyrir stærri skref í gegnum TINC.

TINC er verkefni Innovation Norway upphaflega þróað í samstarfi við norsk tæknifyrirtæki, fjárfesta og tengslanet sérfræðinga í Silicon Valley.

Hraðallinn - hvað er í boði?

  • Aðgengi að samfélagi fyrirtækja og tengslaneti Nordic Innovation House í Silicon Valley 
  • Aðgengi að væntanlegum viðskiptavinum, hluthöfum og fjárfestum 
  • Tækifæri til að staðreyna tækni og viðskiptahugmynd á kröfuhörðum alþjóðlegum samkeppnismarkaði 
  • Aðgengi að mentorum úr smiðju Innovation Norway, Vinnova og Team Finland og tengslaneti þessara aðila í Silicon Valley 
  • Þjálfun og þekkingarmiðlun
  • Þátttaka í fundum, ráðstefnum og viðburðum

Erum við að leita að þér og þínu fyrirtæki?

Heppilegur umsækjandi þarf að uppfylla ákveðin skilyrði;

  • Tæknisproti sem vinnur að lausn sem á sterka möguleika á markaði og mikla vaxtarmöguleika
  • Ætlast er til þátttöku tveggja stjórnenda frá hverju fyrirtæki    
  • Unnið sé að lausn sem er tilbúin til markaðssetningar
  • Þátttakendur þurfa að vera tilbúnir til að leggja út í mikla vinnu í Silicon Valley til að læra og tengjast samstarfsaðilum, viðskiptavinum og fjárfestum. Löngun til að byggja upp varanleg og sterk sambönd og/eða finna sér góðan lendingarstað í Bandaríkjunum 
  • Þátttakendur þurfa að geta sent tvo starfsmenn í verkefnið í fjórar vikur 
  • Fyrirtækið þarf að hafa fjárhagslega burði til að fylgja áframhaldandi vinnu eftir, að verkefninu loknu
  • Lausnin sem unnið er að þarf að hafa sérstöðu á markaði 

Umsóknarfrestur er til 5. júní 2018 (ATH. umsókn þarf að vera á ensku)

Dagsetningar fyrir hraðallinn:

"kick-off" í Osló:  6. og 7. september

4 vikur TINC í Silicon Valley: 15. október til 9. nóvember

 

Nánari upplýsingar á ensku um þennan einstaka hraðal:


Berglind Hallgrímsdóttir
Berglind Hallgrímsdóttir
Forstöðumaður

Reynslan af TINC

Sex íslensk fyrirtæki hafa farið til Silicon Valley í gegnum TINC hraðalinn frá 2016 þegar Ísland tók fyrst þátt. Þetta höfðu nokkrir að segja sem hafa tekið þátt í TINC: 

Vala og Stefanía hjá Visku: “Við vorum með efasemdir fyrst um hvort við ættum að fara í prógrammið. Töldum að það gæti verið of almennt og ekki henta okkur. Við sáum svo sannarlega ekki eftir að hafa slegið til. Prógrammið gefur mjög góða innsýn í stöðuna á markaðnum á hverjum tíma. Þú færð aðgang að vinnusmiðjum með reynslumiklu fólki sem gefur góð ráð og mentorum sem kryfja með þér vandamálin sem þú ert að kljást við. Svo kom það á óvart hversu mikils virði það var að verja 4 vikum með stofnendum sem margir hverjir eru að kljást við mikið af því sama og þú”.

Einar hjá Fonus Juris: ,,Ég var mjög ánægður með þátttöku okkar hjá Fons Juris í TINC verkefninu. Það var frábært að fá tækifæri til að vinna að fyrirtækinu okkar í því frábæra umhverfi sem Nordic Innovation House í Sílikon dalnum hefur skapað. Við fengum ómetanleg ráð og tengingar við fólk sem mun gagnast okkur í framtíðinni. Myndi heilshugar mæla með því að taka þátt".

Trausti Harðarson hjá Huxun: ,,Að taka þátt í viðskiptahraðli TINC í Silicon Valley er eins og að vera komin í viðskiptahraðal á sterum, sérfræðingar sérfræðinganna í skölun og sókn á alþjóðlegan markað, ögra þér og þinni vöru stöðugt í 30 daga, þú einfaldlega verður að hlaupa hraðar. Þetta er auðvitað einstakt tækifæri til að læra af þeim færustu. Þetta er í raun hraðkennsla í því hvernig á að sækja með hugbúnaðarlausnir á bandarískan og alþjóðlegan markað".

Davíð Örn Símonarson hjá frumkvöðlafyrirtækinu Watchbox: „Við bindum miklar vonir við að TINC hraðallinn auki tengslanetið okkar til muna í Silicon Valley. Þetta verður í þriðja sinn sem við förum þangað út í tvo eða fleiri mánuði og vitum við því hvað tengslanetið þar skiptir rosalega miklu máli. Á sama tíma mun hraðallinn auðvelda okkar leið að nýjum kúnnum sem og að koma á fundum með bandarískum fjárfestingarsjóðum".