Stafrænt forskot - fullt á vinnustofurnar, skráning á biðlista hafin.
31. mars 2020
Takk fyrir frábærar viðtökur, fullt er á námskeiðin. Við erum að bjóða upp á biðlista, kanna þörfina og bætum við vinnustofur.
Nýsköpunarmiðstöð Íslands býður upp á Stafrænt forskot, vinnustofu fyrir fyrirtæki á landsbyggðinni til að efla stafræna miðla á netinu. Hulda Birna Baldursdóttir hefur séð um verkefnið ásamt Örnu Láru Jónsdóttur.
„Stafrænt forskot er bæði kennsluefni á netinu á forskot.nmi.is og vinnustofur sem settar voru upp víðs vegar um landið. Þetta er í raun og veru kennsla í markaðssetningu á netinu og nýtingu samfélagsmiðla auk aðstoðar við stefnumótun í markaðsmálum. Þetta hentar öllum litlum og meðalstórum fyrirtækjum sem vilja nýta samfélagsmiðla, leitarvélabestun eða stafrænar lausnir í bókunum, verslun eða þjónustu,“ segir Hulda Birna.
Fystu vinnustofurna voru haldnar í febrúar 2019 á nokkrum stöðum á landinu. Nú hefur það verið fært yfir á netið vegna ástandsins í þjóðfélaginu. Hulda segir að eftirspurnin hafi frá upphafi verið mikil. „Fulltrúar frá um 140 fyrirtækjum og stofnunum hafa setið vinnustofurnar og við erum enn að vinna með mörgum þeirra í áframhaldandi leiðsögn. Eftir svona vinnustofur hafa fyrirtækin betri yfirsýn yfir markmið og stefnu í markaðsmálum.
Inn á vefnum forskot.nmi.is er að finna lista af ráðgjafafyrirtækjum sem sérhæfa sig svo í að sjá um stafræn mál fyrir fyrirtæki.Svo eftir vinnustofurnar vita fyrirtæki meira um samfélagsmiðla, hvar þau vilja vera, og hvað þau eru að leita að.
